Со почетокот на AТП Челинџер турнирот Македонија Опен беше одржана и прес конференција за турнирот кој е од рангот Челинџер 75 за запознавање на јавноста со тенисерите кои овие седум дена ќе бидат дел од тениските случувања на терените на ТК Југ во Градски парк.
Минатата година ветивме и на тоа остануваме, па така и оваа година организираме престижен АТП Челинџер турнир, со награден фонд од 82.000 долари. Наша замисла е овој турнир да биде дел од македонската традиција. Согласно правилата за организација на ваков турнир, федерацијата прави огромни напори, но секако потребна е голема поддршка и помош и од државата како и учество на приватниот сектор преку спонзорства за покривање на сите трошоци. Исто како и минатата година, турнирот се одржува на една недела пред Грен слем турнирот Роланд Гарос. Сметаме дека тоа е исправна одлука особено што на турнирот има играчи кои имаат за цел да направат скок на АТП листата, па така рангот на тенисерите е од 230-300.то место, а нивна цел е пласман во ТОП 100. Ланскиот случај со финалистот Франциско Комесана е најдобар пример, сега е на 87.место на АТП листата. Настап имаат и играчи кои имале добар ранг, но поради повреди сега имаат нешто послаб ранг. Тука пред се мислам на Италијанецот Марко Чечинато, кој има победа и против Новак Ѓоковиќ на Роланд Гарос, а беше и на 16.место на АТП ранг листата (најдобар ранг), тука е и Јиржи Весели од Чешка, кој пак има две победи (нема пораз) над Ѓоковиќ, а бил и високо рангиран. Секако во кругот на тие играчи е и Николоз Басилашвили од Грузија, финалист на Мастерс 1000 турнирот во Индијан Велс, како и победник на пет АТП турнири (три од серијата АТП 500 и два од серијата АТП 250). Од младите тенисери тука е најдобриот јуниор на светската листа во моментов Жоел Шверцлар од Австрија, потоа Федерико Чина, како и хрватските тенисери Матеј Додиг и Лука Микрут, истакна претседателот на федерацијата Александар Ивановски.
Носителите настапот во Скопје ќе го искористат за подобрување на својот ранг особено што покрај паричната награда добиваат и 75 поени, а финалистот 44.
Прв носител е Чун Сенг, кој има 22 години, а во 2018 година беше најдобар јуниор и со најдобар ранг на 82.то место. На турнирот ќе настапат и играчи кои се во добра серија на резултати: Ерги Киркин, кој има победа на еден челинџер турнир и на два фјучрси (оваа пролет), потоа Романецот Филип Кристиан Жиану – четири победи на фјучрс турнири, Готие Онслиен, кој има триумф на челинџер турнир во Прага (финалист Јиржи Весели). Секако нема да заборавиме и на турнирот во двојки кој ќе биде исклучително атрактивен особено што од 16 комбинации дури 13 настапуваат исклучиво во двојки. Македонските тенисери (Димитар Грабул, Берк Бугариќ, Шендрит Деари и Амар Хусеиновиќ) настапија во квалификациите, каде беа елиминирани, а тројца од нив ќе играат и во двојки: Грабул и Бугариќ заедно, додека Хусеиновиќ ќе настапи со Федерико Чина, изјави Горан Шевченко, директорот на турнирот.
На турнирот во двете конкуренции настапуваат 67 играчи од 33 држави, а најмногу има од Италија – 7, од Индија има 5, а од Франција, Полска, Чешка и Македонија – 4. Од 18 држави има по еден тенисер.
Полуфиналните мечеви во двете конкуренции се играат во петок на 24.мај, додека во сабота на 25.мај е финалето во двете конкуренции.
