Македонските кошаркарки по вечерашниот тренинг заминуваат за Сараево

Македонските кошаркарки вечерва патуваат за Сараево каде во четврток ќе го одиграат претпоследниот натпревар од квалификациски циклус за Европското првенство што годинава ќе се одржи во Израел и Словенија,

Селекторот Александар Ашаданов, макар и за момент, може да здивне.

Откако подготовките ги започна со само седум кошаркарки, Ашаданов вчера и денеска на последниот тренинг (закажан за 18 часот), на располагање ги има интернационалките.

Ударното трио предводено од капитенот, Анџелика Митрашиновиќ, Нена Трајчевска и Александра Стојановска, како и Тијана Митрева и Милица Николиќ, им се приклучија на останатите.

Сепак, поради повреди во тимот ќе недостасуваат неколку клучни кошаркарки, Американката, Мерит Хемпе, Матеа Николиќ и Илина Селцова.

И со вакви проблеми, нашите кошаркарки ќе ги одиграат последните два меча во овие квалификации.

Првиот против БиХ во четврток од 20 часот во Сараево, а вториот во Скопје, против Белгија закажан за во недела од 18 часот во СЦ „Кале“.

Македонија е на последното место во А групата без победа, Босанките имаат “скор“ 2-2 (победи-порази), а Белгија и Германија се на првите две места со 3 победи и еден пораз.