Празничните денови се зад нас. Почетокот на оваа седмица, прва работна во новата 2023 година, означи и старт на активностите на уште една наша машка репрезентација. Онаа на играчи родени 2009 година, која ќе има голем број на обврски во наредниот период, а ќе бидат заокружени со настап на традиционалниот меѓународен турнир „Словениа Бол“ во Словењ Градец.
Оваа седмица, кошаркарите родени 2009-та и помлади ќе тренираат во салата на СРЦ „Кале“ во Скопје.
„Откако пред крајот на новата година го реализиравме оној селективен процес, согласно со предвидениот план за работа, продолжуваме понатаму. Во наредниот период во СРЦ ‘Кале’ ќе одработиме еден своевиден зимски камп со оваа генерација на млади кошаркари. Го искористивме зимскиот распуст да направиме мини подготовки од една недела. Повикавме 25 кошаркари кои ќе имаат можност да го дадат својот максимум, а воедно овие подготовки се и последен филтер пред турнирите што следуваат во текот на оваа нова 2023 година“, истакнуваселекторот Владимир Мирковски.
Согласно со календарот, во плановите на стручниот тим во кој освен селекторот Мирковски се вклучени и Мико Голубовиќ и Оливер Тасков, се и учества на два турнири во текот на март и на мај, во Косово и во Бугарија, а кулминацијата ќе биде настапот на силниот меѓународен турнир „Словенија Бол“ во текот на месец август.
