Не стивнуваат реакциите во јавноста по синоќешните објави на социјалните мрежи, а за време на прославата на ФК Вардар на освоената шампионска титула.
Попладнево со реакција до јавноста се огласи и министерот за спорт Борко Ристовски кој го осуди таквото и слични однесувања.
Во продолжение интегрално ви го пренесуваме соопштението на Министерството за спорт.
,,Почитувани,
Во однос на синоќешните видеоснимки кои се појавија од прославата на ФК Вардар, како Министерство, но и од мое лично име како министер за спорт, сакаме да ја известиме македонската јавност дека недвосмислено го осудуваме ваквиот тип прослави, кои вклучуваат навреди по која било основа, особено доколку во нив се вклучени спортски работници, играчи, селектори и лица од јавниот живот.
Слични случувања имаше и минатата недела во Кавадарци, со политички конотации и навреди кон спортски институции, меѓу кои и ФФМ, а истото сега повторно се повторува.
Министерството за спорт најостро ги осудува ваквите провокации и јавно бара чинителите да и се извинат на македонската јавност. Воедно апелираме вакви случувања во иднина да не се повторуваат, затоа што Министерството за спорт ќе изнајде начин секој ваков настан соодветно да биде санкциониран.
Ги разбираме ривалствата меѓу екипите, но не треба да се заборави дека спортот се игра за публиката и дека сите чинители имаат одговорност кон јавноста и општеството.
Со почит,
Министерство за спорт
Следете нé на социјалните мрежи
