Шампионот МЗТ Скопје Аеродром вечерва го пречекува словенечкиот Домжале во рамките од 3.коло на АБА2 лигата.
Ова е исклучително важен натпревар за аеродромци, во борбата за позициите што водат во разигрувањето. Задачата да се оствари победа ќе биде тешка, смета тренерот на МЗТ, Васко Атанасов.
„Играме против исклучително квалитетна екипа, за што доказ се стартните две победи.
Се подготвуваме максимално и ако одиграме на очекуваното ниво, тогаш ќе бидеме многу блиску до целта.
Згора на тоа, играме на домашен терен, каде сум сигурен ќе имаме огромна поддршка од нашите верни навивачи, кои ги повикувам да дојдат во што е можно поголем број.
Сигурен сум дека со нивна помош ќе успееме да им се вратиме на победите во АБА2 и ќе направиме голем исчекор кон пласманот во вториот круг“, изјави Атанасов.
Натпреварот меѓу МЗТ Скопје и Домжале што ќе се игра во СЦА „Јане Сандански“ ќе почне од 20 часот.
