Штип ја врза третата победа во низа совладувајќи го Скопје

Кошаркарите на ГКК Штип запишаа нов триумф во домашната Супер лига, откако на домашен терен го совладаа Скопје со резултат 103-94. Ова е трета последователна победа за штипскиот состав, кој пред околу илјада гледачи во салата „Џексон“ ја потврди одличната форма.

Домаќините силно го отворија натпреварот од седмото коло и по првите десет минути стекнаа значајна предност од 25-17. Гостите од Скопје возвратија со поефикасна игра во вториот период, па на полувреме се замина со резултат 52-47 за домашните.

Третиот квартал донесе голема борба и резултатска неизвесност, а скопскиот тим предводен од расположените Паркер и Џонс се доближи на 71-70. Сепак, штипјани одиграа фуриозно во последната четвртина и со прецизни удари од далечина на Митев, Костоски и Димчевски го скршија отпорот. Со серија од сигурни реализации во завршницата, домашниот тим ја надмина границата од сто поени и рутински ги обезбеди бодовите.

Најефикасен во победничкиот табор беше Американецот, Џок Пал со 38 поени. Тој доби поддршка од сонародникот Хамилтон кој на 18 поени додаде 7 асистенции. Кај гостите од Скопје најмногу се истакнаа Колин Паркер со 29 и Крис Џонссо 23 поени.

Со овој триумф, ГКК Штип стигна до скор од три победи и четири порази, најавувајќи пробив кон горниот дел од табелата. Екипата на Скопје останува на дното од прволигашката конкуренција со само еден триумф и шест порази по седум одиграни кола.