Охрид гостува во Куманово, Бутел и Мулти Есен во меѓусебен дуел ја бркаат првата победа

Викендов продолжуваат возбудувањата во македонската ракометна Супер лига со преостанатите натпревари од деветтото коло. Денешната програма носи две интересни пресметки во Скопје и во Куманово, додека главното внимание е насочено кон утрешното дерби.

Оваа рунда беше отворена синоќа со убедливиот триумф на Алкалоид над Прилеп од 37:27. Денешните натпревари започнуваат во 17:00 часот со градското соочување меѓу екипите на Мулти Есенс и Бутел Скопје. Станува збор за директен дуел на двата тима од самото дно на табелата кои сè уште ја бараат првата сезонска победа.

Вториот денешен натпревар се игра од 18:30 часот, каде составот на Куманово го пречекува фаворизираниот тим на Охрид. Охриѓани се наоѓаат во одлична форма со шест победи и моментално ја држат четвртата позиција со 13 освоени бода. Домаќините ќе се обидат да направат големо изненадување на свој терен за да побегнат од опасната зона.

Колото ќе се комплетира утре со три средби, а во фокусот е големото дерби меѓу Вардар и Еурофарм Пелистер. Големата пресметка на непоразените ривали е закажана за 17:45 часот и директно ќе решава за лидерската позиција. Црвено-црните во моментов имаат максимални 16 бода, додека битолскиот тим заостанува само еден бод зад нив. Во останатите утрешни дуели, Еурофарм Пелистер 2 од 15:30 часот ја пречекува Струга, а Младост од 18:00 часот игра против Тиквеш.