Барселона ја заврши совршената сезона на „Камп Ноу“ со 19 победи во 19 натпревари, триумфирајќи над Бетис со 3-1.
Сепак натпреварот мина во знакот на Роберт Левандовски кој по четири сезони во клубот, емотивно се збогува со навивачите.
Полскиот напаѓач, кој во август полни 38 години, постигна 119 гола на 192 натпревари и освои три титули во Ла Лига и еден Куп на кралот. Левандовски се приклучи на Барселона во 2022 година од Баерн Минхен за 45 милиони евра, во време кога клубот се бореше со финансиски проблеми и последиците од заминувањето на Лионел Меси. Тој стана клучен дел од обновата и остави силен белег во историјата на тимот.
По натпреварот, соиграчите го фрлија во воздух и му аплаудираа додека заминуваше кон соблекувалната.
„Беше чест да играм за овој клуб. Уживавме во неколку прекрасни моменти во овие четири години. Многу сум горд на сè што постигнавме заедно. Денес се збогувам, но секогаш ќе ја носам Барселона во моето срце. Ви благодарам многу, навивачи. Еднаш навивач на Барселона, секогаш навивач на Барселона“, изјави Левандовски.
Ова збогување означува крај на една ера и остава празнина која клубот ќе мора да ја пополни во наредните сезони.
