Работнички останува перфектен, шампионот МЗТ Скопје го следи вечниот ривал

Во машката кошаркарска Супер лига се одигра четири од петте натпревар од шестото коло. По него тимот на Работнички останува единствениот со максимален ефект, а со победа помалку го следи шампионот МЗТ Скопје Аеродром.

Кошаркарите на Работнички стигнаа до шестата победа во исто толку одиграни натпревари. Најтрофејниот македонски клуб славеше тешко над Кожув со резултат 83:80. Во салата „Лазар Лечиќ“. гостите од Гевгелија пружија силен отпор и влегоа во последната четвртина со предност од 64:62. Во драматичната завршница при резултат 78:78, клучните поени за домашниот тим ги постигнаа Робев и Говенс. Роберт Рикиќ доминираше кај победникот со 27 поени и седум скока, додека Ефремовски додаде 13 поени. Во редовите на Кожув најефикасно беше триото Армстронг, Бојчев и Симиќ со вкупно 50 постигнати поени.

Актуелниот шампион МЗТ Скопје Аеродром исто така запиша нови бодови со триумф над градскиот ривал Скопје од 79:60. Аеродромци го скршија отпорот на домаќинот во второто полувреме со цврста одбрана и сигурна реализација во нападот. Најефикасен кај „штрковите“ беше Емир Крајиниќ со 20 поени и осум скока, а Камерон Џонс постигна 18 за поразениот тим.

Во останатите натпревари гостинските екипи забележаа значајни победи во неизвесни завршници. Штип го совлада Пелистер во Битола со 92:87, додека Тиквеш славеше на гостувањето кај Струмица со резултат 75:70. Табелата во Суперлигата ја предводи непоразениот Работнички со 12 бода, пред МЗТ Скопје Аеродром кој има 11 бода. Шестото коло се комплетира утре со пресметката меѓу ТФТ Скопје и МКК Куманово.