Елмас со Наполи гостуваат кај Милан во италијанското четвртфинално дерби во ЛШ

Италија сезонава сигурно ќе има полуфиналист во Лигата на шампионите. Ова беше јасно уште по ждрепката за четвртфиналната рунда која донесе меѓусебен дуел на Наполи и Милан.

Тимовите кои сезонава играат одлично пред се екипата на Наполи во чии редови е и македонскиот репрезентативец Ељиф Елмас, тим кој е многу блиску до освојување на „Скудетото“.

Серија А е приказна за себе, но Лигата на шампионите нешто сосема друго. „Наполитанците“ се надеваат дека и во ова натпреварување можат да се вмешаат во борбата за трофејот, а Милан пак дека по долги години повторно ќе стигне до најпосакуваниот трофеј во Европа.

Калкулациите се едно, а можностите во моментов сосема друго, па аналитичарите блага фаворитска улога на првиот меч му даваат на Милан.

Причината пред се е убедливата победа на „росо-нерите“ во меѓусебниот дуел одигран во Неапол каде славеа со 4-0, натпревар одигран само пред 10 дена.

Но, и повредата на најдобриот стрелец во Наполи и Серија А сезонава, Нигериецот, Осимех дополнително ја подгрева надежта на Милан за успех во вечерашниот меч што ќе се игра на стадионот „Сан Сиро“ од 21 часот.