Ракометарите и навивачите на Охрид се радуваат на првиот клупски трофеј. Овој не е било каков туку освоен на европската сцена.
ГРК Охрид и по втор пат славеше победа над Татабања во финалето на ЕХФ Европскиот куп. Охриѓани во реваншот влегоа со гол предност од првиот меч во Унгарија каде славеа 29-28. Вечерва пак пред својата публика, во преполната сала „Биљанини Извори“, Охрид ја победи Татабања со 31-25.
Првото полувреме го одбележаа двајцата голмани. Охридскиот, Иванковиќ имаше 10, а унгарскиот Андо една повеќе (11).
Охриѓани во 18.минута ја имаа најголемата предност од три гола 8-2. Но веќе во 20.минута големи проблеми за македонскиот тим, откако еден од најдобрите ракометари на Охрид, Иванковиќ заработи црвен картон. Тоа гостите знаеја да го искористат и да дојдат до израмнување (8-8), а потоа и поведат (8-9). Сепак, избраниците на Ројевиќ не ја „изгубија главата“. Брзо ги консолидираа редовите и повторно ја презедоа контролата над резултатот. Охрид на полувреме замина со гол предност 12-11.
На стартот на второто полувреме, Охрид стартуваше фуриозно. Со три врзани гола охриѓани дојдоа до четири позитива (15-11), што беше знак за принуден тајм-аут. Но, и тоа не им помогна на Унгарците, бидејќи по примениот гол Охрид врза два нови и поведе со +5 (17-12). Иако тоа беше во 35.минута, уште тогаш беше јасно дека Охрид ита кон победата и трофејот. Охридските „гладијатори“ знаеја како да го крунисаат тоа, па на крајот славеа со конечни 31-25.
До првиот клупски трофеј и тоа европски, Охрид го предводеа Јапонецот, Јасухира со 9 и Словенецот, Стрмљан кој постигна 6 гола.
Со тоа Македонија, стана една од четирите земји која два пати во низа триумфирала во ова натпреварување. потсетување дека лани до трофејот во ЕХФ Европскиот куп стигна тимот на Алкалоид.
Следете нé на социјалните мрежи
