Натпреварите против Молдавија и Црна Гора се многу важни за следните квалификации, вели селекторот на фудбалската репрезентација на Македонија, Благоја Милевски.
Тој потенцира дека посебен акцент ќе биде ставен на зајакнување на добрата атмосфера и заедништво.
„Со нетрпение го очекуваме новиот собир по подолга пауза од последниот натпревар од квалификациите за Европското првенство.
Во Турција ќе патуваат 28 фудбалери. Сметам дека нема причина за некои поголеми промени.
Остануваме со верба во играчите кои ги одиграа последните квалификации, со тоа што за прв пат го повикавме Лирим Ќамили од дански Хвидовре. Се работи за офанзивен фудбалер кој има континуитет на добри игри во својот клуб и сакаме да го видиме во репрезентативната средина“,
изјави Милевски.
Дуелите со Молдавија и Црна Гора, ќе послужат како подготовки за новиот циклсу во Лигата на нациите.
„Натпреварите против Молдавија и Црна Гора ни се многу важни во подготовките за следните квалификации, со посебен акцент на зајакнување на добрата атмосфера и заедништво.
Треба да бидеме подготвени и полни со мотив, иако се работи за пријателски натпревари.
На тренинзите и натпреварите треба да влеземе сериозно, одговорно и цврсто. Тоа ќе го барам од сите во тимот.
Фокусот ќе биде на тактичките замисли и како треба да изгледаме во Лигата на нации, а тоа значи игра во која ќе бидеме рационални, паметни, агресивни, компактни и фокусирани“, нагласува Милевски.
Натпреварите ќе се играта во Анталија, на 22 и 25 март.
