Машката македонска ракометна репрезентација е во Стара Пазаова каде ги започна подготовките за Европското првенство.
Традиционално македонските ракометари имаат голема поддршка на настапите на големите натпреварувања. Така ќе биде и овојпат во Германија, каде од 10 јануари Македонија го започнува новиот настап.
Но, тешко или подобро речено никако не може да се стигне до карти за воведниот натпревар против Франција. За спектаклот на денот на отворањето на првенството Македонија и Франција ќе играат на арената „Меркур Шпил“ во Дизелдорф. Иако стадионот е со капацитет од 50.000 места речиси е невозможно да се обезбеди влезница.
Затоа денеска Ракометната федерација на Македонија излезе со соопштение до македонската јавност.
„Ве известуваме дека до Ракометната Федерација на Македонија секојдневно пристигнуваат барања за билети за претстојното Европско ракометно првенство во машка сениорска конкуренција, кое ќе се одржува во Германија во период од 10ти до 28ми јануари 2024 година.
Ракометната Федерација на Македонија, односно машката сениорска репрезентација е учесник на претстојниот спортски настап, согласно регулативата на Европската ракометна федерација правата за продажба на билети за европски спортски настани се кај домаќинот на првенството, во овој случај тоа е ракометната федерација на Германија и нивниот организационен комитет.
Европската ракометна федерација преку своите медиумски соопштенија уште во месец мај 2023 година, објави дека има огромен интерес за билети за претстојното првенство и дека половина од билетите за натпреварите во продажба се веќе распродадени, особен интерес и побарувачка за билети имаше во групата А каде настапува и македонската сениорска репрезентација, бидејќи во група А се наоѓа и домаќинот Германија.
Од страна на организаторот преку online мрежата за продажба, во месец септември 2023 година беа пуштени во продажба и последните слободни 10.000 билети, кои во екстремен брз временски рок беа распродадени.
Ве молиме бидете информирани дека билетите за натпреварите во група А, каде настапува и македонската репрезентација, по добиената информација од страна на ракометната федерација на Германија и нивниот организационен комитет се распродадени.
