Изминатата ноќ на терените во најсилната кошаркарска НБА лига се одиграа вкупно десет возбудливи натпревари од регуларниот дел на сезоната. Во центарот на вниманието беа новите блесоци на Лука Дончиќ и Никола Јокиќ во победите на ЛА Лејкерс и Денвер.
Словенечкиот плејмејкер одигра уште една маестрална партија и го предводеше составот од Лос Анџелес до гостински триумф кај Милвоки со 123:112.
Лука Дончиќ го заврши дуелот како најефикасен поединец со 32 постигнати поени за само 32 минути минати на паркетот. Одлична поддршка во победничкиот табор имаше од Сандро Мамукелашвили со 23 поени и Остин Ривс кој додаде 18 поени. Ова беше седма победа во низа за „езерџиите“, кои сега се лидери на Западот со учинок од единаесет победи и два порази. Кај домаќините најмногу се истакнаа Тајлер Хиро со 25 поени и Хаиме Хакез со 23 постигнати поени.
Неизвесно беше и во Мемфис, каде кошаркарите на Денвер славеа над домашниот состав со тесни 123:118.
Српскиот центар Никола Јокиќ повторно беше незапирлив под обрачите и оствари дабл-дабл учинок од 27 поени и 11 скокови. На тоа додаде и осум асистенции, па за малку му избега нов трипл-дабл во дресот на тимот од Колорадо. Прв стрелец кај победниците беше Џамал Мареј со 30 поени и осум додавања, додека Камерон Џонсон уфрли 23 поени. Во редовите на Мемфис најефикасни беа Џејлен Велс и Тај Џером со по 22 постигнати поени.
Големо внимание привлече и десеттата едноподруго победа на Сан Антонио на гостувањето во Чикаго со 124:119, предводен од Виктор Вембањама со 32 поени.
Резултати од ноќешните НБА натпревари:
Индијана – Вашингтон 114:101
Њујорк – Кливленд 107:115
Торонто – Бостон 93:98
Чикаго – Сан Антонио 119:124
Мемфис – Денвер 118:123
Милвоки – Лос Анџелес 112:123
Њу Орлеанс – Бруклин 111:145
Јута – Орландо 108:123
Хјустон – Голден Стејт 115:108
Портланд – Оклахома Сити 118:108
