Познати двојките за плеј-офот во кошаркарскиот шампионат на Македонија

Дербито од последното 22.колои во Првата машка лига им припадна на кошаркарите на МЗТ Скопје Аеродром кои минимално со 95-93 го добија битолски Пелистер.

Иако во најголемиот дел од натпреварот актуелниот шампион беше во предност, па во еден период од третата четвртина водеше и со 17 разлика 65-48, се доведоа аеродромци на крајот да стравуваат за победата.

Стигна Пелистер во завршните 20.секунди на -1, но една најнапред техничката грешка која беше досудена над Хаџифејзовиќ, поради „симулирање фау“, а потоа и промашувањето на Карпентер, го спаси МЗТ од пораз или подобро речено, не му донесе победа на Пелистер.

Дури десетмина играчи средбата ја завршија со двоцифрен број на поени, а најмногу постигнаа гостинските Стаиќ и Хаџифејзовиќ по 22, додека капитенот Дамјан Стојановски си 16 и Американецот, Кук со 15 беа најефикасни во победничката екипа.

Во „Кале“ екипата на Кожув го надигра домашниот Работнички со убедливи 86-58, но гевгеличани и покрај оваа победа останаа на осмата позиција на табелата па во четвртфиналето ќе играат со шампионот МЗТ Скопје Аеродроми.

Со одигрувањето на денешните натпревари познат е пласманот на екипите од првото до осмото место, а со тоа и двојките за четвртфиналето во плеј-офот.