Дејан Манасков го одби повикот на селекторот Кирил Лазаров да се врати во дресот на македонската репрезентација.
Манасков кој има фантастични настапи со тимот на Еурофарм Пелистер, се најде на поширокиот список на Лазаров за претстојните натпревари на Македонија со Јапонија.
Нарушените односни со Лазаров се причината поради која искусниот Манасков нема да одговори на „поканата“ на селекторот.
Крилниот ракометар, денеска на својот Фејсбук профил, ја образложи својата одлука.
„Почитувани,
Би сакал да ја информирам цела македонска јавност и сите медиуми дека во моментов, за доброто на националниот тим, нема да настапувам за македонската ракометна репрезентација. Ке бидам искрен и краток во моето обраќање и објаснување на одлуката.Во изминатите единаесет години, колку што настапував за македонската селекција, секогаш со чест и гордост го носев светиот дрес. Се борев и настапував секогаш со цело срце.
Моите односи со селекторот Кирил Лазаров се нарушени и не гледам простор во моментов истите да се подобрат.
Последните две години неправедно бев неповикуван. После сè што дадов, чувствувам дека Македонија премногу лесно се откажа од мене. Тоа премногу ме погоди и после долго размислување ја донесов оваа одлука.
Им посакувам многу среќа и успех на репрезентативците во следниов период. Дотогаш ќе бидам ваш најголем навивач и поддржувач. До некое следно видување Македонијо!
Дејан Манасков
