Ракометната сцена во Македонија е подготвена за уште едно возбудливо издание на „Фајнал-фор“ турнирот во Купот на Македонија за жени, што ќе се одржи во Радовиш. Во салата „25 Мај“ денеска ќе се играат полуфиналните натпревари во кои најдобри екипи ќе се борат за место во големото финале.
Четири екипи ќе се борат за трофејот што ќе го бранат ракометарките на Ѓорче Петров. Тие како и лани ќе се обидат сезоната да ја завршат со двојна круна, откако веќе го освоија шампионскиот трофеј. Нé очекуваат возбудливи дуели, исполнети со емоции, адреналин и спортска борба.
Ѓорче Петров – Вардар (17:00 часот)
Првиот полуфинален натпревар, со почеток во 17:00 часот, носи вистинско дерби – ЖРК Ѓорче Петров против ЖРК Вардар. Актуелниот освојувач на Купот, Ѓорче Петров, ќе се обиде да ја одбрани титулата од минатата година и повторно да се избори за место во финалето.
Со стабилна форма и искусен состав, Ѓорче влегува во овој натпревар како фаворит, но Вардар нема намера да се откаже лесно.
Чаир – Металург Автокоманда (19:30 часот)
Во второто полуфинале, со почеток во 19:30 часот, ќе се сретнат Металург и Чаир. Вицешампионот Металург оваа сезона прикажува одлична форма и влегува мотивирано, но на вакви натпревари нема изразен фаворит.
Чаир игра храбро и со голема енергија, и сигурно нема да се откаже без борба. Се очекува цврст и неизвесен дуел за последното место во финалето.
Бесплатен влез
Влезот е слободен, а организаторите ги повикуваат сите љубители на ракометот да дојдат и да ја исполнат салата „25 Мај“ со поддршка и спортски дух.
Победниците од денешните полуфиналиња ќе се сретнат во големото финале, закажано за утре во 16:00 часот.
Историја и рекордери
Бранител на титулата е Ѓорче Петров, кој минатата година го освои пехарот совладувајќи го Чаир во финалето. Но, кога станува збор за најтрофејниот клуб во историјата на Купот, Кометал Ѓорче Петров е апсолутен рекордер со 17 титули. Овој клуб доминираше во македонскиот женски ракомет со години, оставајќи силен печат во историјата на натпреварувањето.
Со оглед на квалитетот на екипите и нивната амбиција, љубителите на ракометот можат да очекуваат интересни натпревари иако „Лавиците“ од Ѓорче важат за фаворитки.
Ивона Кимовска
Следете нé на социјалните мрежи
.
