Работнички по трета победа на гостувањето кај Пелистер – Се комплетира 3.коло во Супер лигата

Денеска со три натпревари ќе се комплетира третото коло во машката кошаркарска Супер лига на Македонија.

Главниот фокус на кошаркарската јавност без сомнение ќе биде насочен кон Битола, каде што силите ќе ги одмерат старите ривали Пелистер и Работнички. Домашниот состав влегува во оваа средба со половичен ефект од една победа и еден пораз на стартот од првенството. Од друга страна, најтрофејниот македонски кошаркарски колектив Работнички досега забележа две победи во исто толку одиграни натпревари и сака да ја продолжи победничката низа. Дербито во салата „Боро Чурлевски“ започнува во 19:00 часот.

Програмата започнува еден час порано во Кавадарци, каде што од 18:00 часот Тиквеш го пречекува тимот на МКК Куманово. Двата ривала имаат идентичен биланс на табелата со по една победа и еден пораз во воведните две кола. Домашниот терен ќе биде значаен адут за кавадарчани, но кумановци покажаа дека можат да бидат незгоден противник за секого.

Завесата на денешното коло ќе биде спуштена во главниот град, каде што КК Скопје 2023 од 19:30 часот ја пречекува екипата на Струмица. Домашниот состав имаше тежок почеток на шампионатот и сè уште ја бара првата победа по претрпените два порази во првите две средби. Струмичани пак доаѓаат со скор од една победа и еден пораз, максимално мотивирани да освојат значајни бодови на гостински терен.