Италијанскиот гигант Наполи официјално испрати понуда до РБ Лајпциг за повторно ангажирање на македонскиот репрезентативец Ељиф Елмас. Информацијата ја објави реномираниот новинар Фабрицио Романо на својот „Twitter профил“.

Според него, понудата се состои од позајмица вредна 1,5 милиони евра, со опција за откуп од 11,5 милиони евра. Понудата би можело да го врати Елмас на „Сан Паоло“ по само година и пол отсуство.

Елмас беше дел од Наполи од 2019 до јануари 2024 година, кога се пресели во Лајпциг за сума од околу 24 милиони евра. Сепак, неговиот престој во Бундес лигата не донесе очекуваниот развој. Тој во зимскиот преоден рок беше испратен на позајмица во Торино, каде што одигра 13 натпревари и постигна 4 гола. Иако Торино беше заинтересиран за продолжување на соработката, Лајпциг не беше подготвен за нова позајмица, отворајќи простор за Наполи.

Со оглед на неговото претходно искуство во клубот и популарноста меѓу навивачите, враќањето на Елмас би било не само тактички потег, туку и емотивна приказна за повторно обединување.

Покрај Наполи, интерес за Елмас покажаа и клубови од Премиер лигата, меѓу кои и Вест Хем, кој веќе испратил барање за информации околу евентуален трансфер. Сепак, Елмас наводно ја преферира опцијата за враќање во Наполи, каде што веќе има изградено статус и доверба.

ПОВРЗАНИ НАПИСИПОВЕЌЕ ОД АВТОРОТ