Подмладената македонска кошаркарска репрезентација со нова енергија и желба за докажување утре го почнува новиот циклус на квалификации.
Во првиот меч од првата квалификациска рунда за Светското првенство 2027-ма, Македонија во Куманово ќе ја пречека селекцијата на Романија.
Новиот предводник на оваа селекција Марјан Илиевски на денешната прес-конференција ги изнесе своите очекувања, за овој циклус на натпревари.
„Овие играчи коишто во моментот се присутни во репрезентација се играчи кои навистина со гордост ќе го носат дресот во утрешниот натпревар.
Она што го прикажуваат во овој период, е една сосема нова енергија, која верува пред самата јавност и преполна сала во која се надеваме дека ќе го играме овој натпревар, ќе го дадат својот максимум.
Тој императив, играчите кои што носат промени после подолг временски период, ќе го прикажат на терените, дека она кое што го имаат како квалитет, а тоа е енергија, младост и желба за победа, ќе биде присутен на на утрешниот натпревар“, изјави селекторот Илиевски.
„Од она што го имаме како анализа за Романија, ние до десет часа пред да пристигнат, немавме информација дали ќе играат со странски кошаркар. Останува дека ќе играат без странец, што сигурно ни значи.
Знаеме дека станува збор за играчи кои настапуваат редовно во своите клубови и кои инсистираат на физичка игра. Она на што треба да обрнеме внимание е играта под обрачите, ќе треба да го сопреме центарот Кате, кој е играч со големо искуство и ќе треба да се фокусираме на него.
Сепак, ќе внимаваме и на останатите, но сакам да потенцирам – мораме да се фокусираме на нас, на она што ние треба да го одиграме и да напредуваме. Секако имаме почит за противникот, но ние секогаш ќе се фокусираме на нас и нашата игра“.
Натпреварот Македонија – Романија што ќе се игра утре во кумановската реновирана сала, ќе почне до 20 часот.
Следете нé на социјалните мрежи
