Охрид и Еурофарм Пелистер одиграа драматичен дуел кој беше решен во последната секунда (ВИДЕО)

Првото големо ракометно дерби во машката Супер лига ги оправда сите очекувања. Дуелот од воведното коло одигран во СЦ „Билјанини извори“ меѓу Охрид и Еурофарм Пелистер понуди врвен ракомет, голема борбеност, искри на теренот и одлична атмосфера. На крајот, најреално натпреварот заврши без победник 28-28 и тоа благодарени на голот на Петар Атанасијевиќ во последната секунда.

Гостите од Битола подобро го започнаа натпреварот и постојано имаа предноста. Најголемата во првиот дел изнесуваше два гола во 16.минута кога пелситерци водеа со 6-8. Тука подзастанаа избраниците на Лино Червар, па домашниот состав го искористи тоа и направи пресврт. Охриѓани за првпат поведоа во 21.минута со 11-10. Сепак предноста на домаќините не траеше, па на полувреме гостите од Битола беа оние кои заминаа со гол позитива 13-14.

И во второто полувреме се играше безмалку гол-за-гол. На стартот зелено-белите поведоа со +2 (13-15), во 37.минута сините од Охрид ја презедоа предноста и тие за прв пат имаа два позитива (18-16). Предноста домашниот тим ја одржуваше се до 26.минута кога Петар Атанасијевиќ, донесе водство на гостите со 25-26.

Во последните помалку од 3 минути се влезе со израмнет резултат 27-27, а така беше се до завршните секунди. Прво на 25.секинди пред крајот, Унгарецот, Доминик Мате погоди за 28-27 на Охрид. Во последниот напад на секунда пред крајот израмни Петар Атанасијевиќ со својот 8 гол.

Прв стрелец на натпреварот беше Мете со 11 голови за Охрид, а капитенот на пелистерци Филип Кузмановски завршпи со еден помалку (10).

Во следното коло Охрид го пречекува соседот Струга, а Еурофарм Пелистер ќе биде домаќин на Мунти Есенс.